कविता

आज झरी पर्यो (कविता)

                भगवती बस्नेत

अनायासै बर्षिएको झरीलाई
झ्यालको कुनाबाट नियाल्दै बसिरहे
ती रुमानी झरीका यादहरुले ...
मलाई नजानिदो गरि रुझायो
आज झरी पर्यो !

आकाशको गर्जनसँगै
मनका अशान्त भावहरु
उसैको आवाजमा बिलिन भए
बादलबाट झरेका वर्षाको कणसँगै
आँशुका ढिक्काहरु
गाला भिजाऊदै
मनका दु:खहरु बगेर गए !
आज झरी पर्यो !

झरी पछिको खुल्ला आकाश
सप्तरंगी इन्द्रधनुषले
जीवन रंगीबिरंगी
सुख दु:ख
सन्तुष्टि, असन्तुष्टिको
संगम हो
भन्ने सिकाएर गयो !
आज झरी पर्यो,आज झरी पर्यो !!